ब्रेकिंग

रेल्वेस्थानकात प्रवाशांची गर्दी वाढली

Wrutuja pandharpure
17 May 2025

तिकिटासाठी रांगा

पुणे : उन्हाळी सुट्यांमुळे रेल्वेने प्रवास करणार्‍या प्रवाशांच्या संख्येत लक्षणीय वाढ झाली आहे. त्यामुळे स्थानकात प्रवाशांची प्रचंड गर्दी होत आहे. तसेच तिकीट काढण्यासाठी प्रवाशांच्या लांबच लांब रांगा लागत आहेत.

पुणे रेल्वे स्थानकात ये-जा करणार्‍या प्रवाशांच्या बॅग तपासणीसाठी मुख्य प्रवेशद्वार येथे स्कॅनिंग लावले आहे. मात्र, गेली कित्येक दिवस हे स्कॅनर मशीन बंद आहे. तसेच नव्याने पादचारी पुलावर दोन बॅग स्कॅनिंग मशीन बसविण्यात आले आहे; परंतु येथून ये-जा करणार्‍या प्रवाशांचे बॅग तपासणीकडे आरपीएफ कर्मचार्‍यांकडून दुर्लक्ष होत आहे. त्यामुळे रेल्वे प्रवाशांची सुरक्षा रामभरोसेच आहे. उन्हाळा सुरू असल्याने प्रवाशांची गर्दी वाढली आहे. मध्य रेल्वे विभागातील पुणे रेल्वे स्थानक हे एक महत्त्वाचे विभाग आहे.

पुण्यातून दैनंदिन दोनशेपेक्षा जास्त गाड्या धावत असतात. त्यातून दीड लाखापेक्षा जास्त नागरिक प्रवास करतात. सध्या उन्हाळी सुटी असल्याने रेल्वेला गर्दी वाढली आहे, शिवाय पुणे रेल्वे स्थानकावरून उत्तरेत जाणार्‍या गाड्यांना नेहमीच गर्दी असते. स्थानकावर प्रचंड गर्दी होती.